انا ما تخليت عنك، وما تركتك بوقت الشدّة
انا بقيت صامدة ودافع عنك بالرغم من كل شي انقال
عرضك وشرفك يا بيروت من عرضي وشرفي
شفتك احلى من الكل
شفتك عروس مكللي
وكل زهرة فيك بتدل لمطرح كأنك بغير دني
شو بدي قول لقول
من جبيل لصور ولاّ بعلبك واهدن وصيدا والشوف
ولك انت احلى عروس
اهلي بعكّار حبوكي
وخوالي ببنت جبيل دايما بينطروكي عالمشاوي والتبوله
واهل جدّي بزحله دايما بيقولولي
جيبي عروستنا بيروت لنسهر ولعيونك اطيب منقوشي
قلتلن بيروت مش على بعضها هل الكم يوم
والكم بيوم صاروا كم شهر
والكم شهر صاروا سنين
وصار الحكي يطلع عليكي يا بيروت وانا دافع وقلّن
هيدي دمّي وشرفي وعرضي
قالولي سرقوكي ما صدقتن
قالولي اغتصبوكي ما صدقتن
قالولي نهبوكي قلتن بيروت قويه
قالولي يلعن ابو بيروت
قلتن يلعن ابو كل مين مد ايدوا عليها
بيروت مش هيك!! ما تخافي.. أنا بعرفك كتير منيح
بس سامحيني
هل المرّة ما قدرت اوقف بوجهن لدافع عنّك
هل المرّة انا قررت فل ولاقي لالي بيروت تانيه ما تخذلني
انا قلتلن بيروت وفيّة
قلتلن بيروت بتستاهل ابني معها مستقبلي ومستقبل ولادي
بس انت يا بيروت ما بقى منك شي... كل واحد اخد شقفه منك!
واصبح عرضك منهوك وشرفك ملعون واكليل الزهر فرط وصار كل شقفه بلون
وهيدا بيقلك هيدي الي وهيدي القطعه الك
وانا ما بقالي منك شي غير الذكره والصور القديمه
حضل حبّك وحضل قول "يوما ما.. كان هناك بيروت!"
بقلم: هبة م. دلاّل
طباعة المقال
ارسل إلى صديق
اضافة إلى المفضلة
حفظ الموضوع
